മേപ്പയ്യൂരിലും അരിക്കുളത്തും കുറുക്കന്റെ ആക്രമണം; ആറ് പേര്‍ക്ക് പരിക്കേറ്റു
മേപ്പയ്യൂര്‍: മേപ്പയ്യൂരിലും അരിക്കുളത്തും കുറുക്കന്റെ ആക്രമണത്തില്‍ ആറ് പേര്‍ക്ക് പരിക്കേറ്റു. മേപ്പയ്യൂര്‍ – ചങ്ങരം വെളളിയിലും അരിക്കുളം മേലിപ്പുറത്ത് ഭാഗത്തും സ്ത്രീകള്‍ ഉള്‍പ്പെടെയുള്ളവരെയാണ് കുറുക്കന്‍ ആക്രമിച്ചിരിക്കുന്നത്. പുതുക്കുടി മീത്തല്‍ സരോജിനി, നന്ദാനത്ത് പ്രകാശന്‍, മഠത്തില്‍ കണ്ടി പ്രമീള, എരഞ്ഞിക്കല്‍ ഗീത, പാറക്കെട്ടില്‍ സൂരജ് എന്നിവര്‍ക്കാണ് പരിക്കേറ്റത്.
മഠത്തില്‍ കണ്ടി പ്രമീള, എരഞ്ഞിക്കല്‍ ഗീത, നന്ദാനത്ത് പ്രകാശന്‍ എന്നിവരെ കോഴിക്കോട് മെഡിക്കല്‍ കോളേജിലും പാറക്കെട്ടില്‍ സൂരജിനെ കൊയിലാണ്ടി താലൂക്ക് ആശുപത്രിയിലും പ്രവേശിപ്പിച്ചു.
പുതുക്കുടി മീത്തല്‍ സരോജിനിയെ കുട്ടികളെ ആക്രമിക്കാന്‍ ശ്രമിക്കുന്നതിനിടയിലാണ് വീടിന്റെ മുന്‍വശത്തുവെച്ച് കടിച്ചത്. മുഖത്തും തലയിലും ഇരു കൈകളിലും, കാലിലുമാണ് സരോജിനിയ്ക്ക് കടിയേറ്റത്.
നന്ദാനത്ത് പ്രകാശനെ രാവിലെ സൊസൈറ്റിയില്‍ പാല് കൊടുക്കാന്‍ പോകുമ്പോഴാണ് കടിച്ചത്. വിവിധയിടങ്ങളില്‍ നിന്നായി മഠത്തില്‍ കണ്ടി പ്രമീള, എരഞ്ഞിക്കല്‍ ഗീത, പാറക്കെട്ടില്‍ സൂരജ് എന്നിവര്‍ക്കും ആക്രമത്തില്‍ പരിക്കേറ്റിട്ടുണ്ട്.
ആക്രമിച്ച കുറുക്കനെ നാട്ടുകാര്‍ തല്ലി കൊന്നു. പ്രദേശത്ത് കുറക്കന്റെ ശല്യം കൂടിയതായി നാടുകാര്‍ പറയുന്നു. ജനങ്ങളോട് ജാഗ്രത പാലിക്കണമെന്ന് അരിക്കുളം, മേപ്പയൂര്‍ ഗ്രാമപഞ്ചായത്ത് അധികൃതര്‍ അറിയിച്ചിട്ടുണ്ട്.