തൃശൂർ: ചാലക്കുടിയിൽ പട്ടാപ്പകൽ ബാങ്ക് കൊള്ള. ചാലക്കുടി പോട്ടയിലെ ഫെഡറൽ ബാങ്ക് ശാഖയിലാണ് നാടിനെ നടുക്കിയ സംഭവം. ഇന്ന് ഉച്ചയ്ക്കാണ് കൊള്ള നടന്നത്. ഈ സമയത്ത് മാനേജറും ഒരു ജീവനക്കാരനും മാത്രമാണ് ബാങ്കിൽ ഉണ്ടായിരുന്നതെന്നാണ് വിവരം. മറ്റുള്ള ജീവനക്കാർ ഭക്ഷണം കഴിക്കാൻ പോയിരുന്നു.

കത്തി കാട്ടി ഭീഷണിപ്പെടുത്തിയാണ് പണം കവർന്നതെന്നാണ് ജീവനക്കാർ പറയുന്നത്. ക്യാഷ് കൗണ്ടറിന്റെ ചില്ല് കസേര ഉപയോഗിച്ച് തകർത്താണ് മോഷണം നടത്തിയത്. മോഷ്‌ടാവിന്റെ കൈയിൽ ആയുധമുണ്ടായിരുന്നു. മാസ്‌കും ജാക്കറ്റും ഹെൽമറ്റും ധരിച്ചിരുന്നതിനാൽ ആളെ തിരിച്ചറിയാൻ സാധിച്ചിട്ടില്ലെന്ന് ബാങ്ക് ജീനക്കാർ പറഞ്ഞു.

ബൈക്കിൽ എത്തിയ ആളാണ് മോഷ‌ണം നടത്തിയത്. ഇയാൾ ബാങ്കിലേക്ക് വരുന്ന ദൃശ്യം സിസിടിവിയിൽ പതിഞ്ഞിട്ടുണ്ട്. വൻ പൊലീസ് സംഘം സ്ഥലത്തെത്തി അന്വേഷണം ആരംഭിച്ചു.