കൊയിലാണ്ടി-എടവണ്ണ സംസ്ഥാന പാതയില്‍ മദ്യലഹരിയില്‍ ആടിയുലഞ്ഞ് ബൈക്ക് യാത്ര; പിന്നാലെ മുന്നില്‍ നിര്‍ത്തിയ ബൈക്കിലിടിച്ച് അപകടം, രണ്ടുപേര്‍ക്ക്‌ പരിക്ക്
കൊയിലാണ്ടി: മദ്യലഹരിയില്‍ ബൈക്ക് ഓടിച്ച യുവാക്കള്‍ക്ക് വാഹനാപകടത്തില്‍ പരിക്ക്. കൊയിലാണ്ടി-എടവണ്ണ സംസ്ഥാന പാതയില്‍ ഇന്നലെ രാത്രി 10.30ഓടെയാണ് സംഭവം.
മുക്കം പാലത്തിനും നോര്‍ത്ത് കാരശ്ശേരി പാലത്തിനും ഇടയിലാണ് അപകടമുണ്ടായത്‌. മദ്യലഹരിയില്‍ ആടിയുലഞ്ഞ് യുവാക്കള്‍ ബൈക്കില്‍ യാത്ര ചെയ്യുകയായിരുന്നു. മറ്റ് വാഹനങ്ങള്‍ക്ക് അപകടം ഉണ്ടാക്കുന്ന രീതിയില്‍ തെറ്റായ ദിശയില്‍ വളഞ്ഞ് പുളഞ്ഞായിരുന്നു ബൈക്കിലുള്ള ഇവരുടെ യാത്ര. ഇരുവരും ഹെല്‍മറ്റും ധരിച്ചിരുന്നില്ല.
ഇവര്‍ക്ക് പിന്നിലുള്ള വാഹനത്തിലുള്ളവരാണ് ദൃശ്യങ്ങള്‍ പകര്‍ത്തിയത്. ദൃശ്യങ്ങളില്‍ ഇവര്‍ സഞ്ചരിച്ചിരുന്ന ബൈക്കിന് പിന്നാലെയെത്തിയ യാത്രക്കാരന്‍ ഇരുവരെയും തിരിഞ്ഞു നോക്കുകയും കുറച്ച് ദുരം മുന്നോട്ട് പോയി ബൈക്ക് നിര്‍ത്തുന്നതുമാണ് കാണുന്നത്. പിന്നാലെ യുവാക്കള്‍ ഓടിച്ച ബൈക്ക് നിര്‍ത്തിയ ബൈക്കില്‍ ഇടിച്ച് മറിയുകയും റോഡിലേക്ക് തെറിച്ച് വീഴുകയുമായിരുന്നു. പരിക്കേറ്റ ഇരുവരെയും മുക്കത്തെ സ്വകാര്യ ആശുപത്രിയില്‍ പ്രവേശിപ്പിച്ചു.