---

മഞ്ഞ പല്ലുകളുടെ പ്രശ്നം പുതിയ കാര്യമൊന്നുമല്ല. ആളുകൾ പലപ്പോഴും ഈ പ്രശ്നം അനുഭവിക്കുന്നു. സൗന്ദര്യത്തിൽ പല്ലുകൾ ഒരു അവിഭാജ്യമായ പങ്ക് വഹിക്കുന്നു, അതിനാൽ ആളുകൾ പല്ലുകളെ ആരോഗ്യമുള്ളതും വൃത്തിയുള്ളതും മനോഹരവും വെളുത്തതുമായി സൂക്ഷിക്കുന്നതിൽ കൂടുതൽ ശ്രദ്ധ കാണിക്കുന്നു. മഞ്ഞ പല്ലുകൾ ഒഴിവാക്കാൻ മിക്കവരും പലപ്പോഴും തിരഞ്ഞെടുക്കുന്ന ഒരു പ്രധാന രീതിയാണ് പല്ല് വെളുപ്പിക്കൽ. എന്നിരുന്നാലും, ഈ പ്രക്രിയ പല്ലുകൾക്ക് കേടുപാടുകൾ വരുത്തുമെന്ന് ചിലർ വിശ്വസിക്കുന്നതിനാൽ പല്ലുകൾ വെളുപ്പിക്കുന്ന ടീത്ത് വൈറ്റനിംഗ് രീതിയോട് ആളുകൾക്ക് പൂർണമായും യോജിപ്പില്ല എന്നതാണ് സത്യം. പല്ലുകൾ വെളുത്തതും തിളക്കമുള്ളതുമാക്കാൻ മറ്റ് നിരവധി മാർഗ്ഗങ്ങളുണ്ട്.

പല്ലുകളുടെ മഞ്ഞ നിറത്തിന് പിന്നിൽ

മഞ്ഞ പല്ലുകളുടെ പ്രശ്നത്തിനുള്ള പരിഹാരത്തിലേക്ക് പോകുന്നതിന് മുൻപായി, ആദ്യം നമ്മുടെ പല്ലുകൾ മഞ്ഞയായി മാറുന്നത് എന്തുകൊണ്ടാണെന്ന് നമുക്ക് മനസിലാക്കാം. മഞ്ഞ പല്ലുകളുടെ ചില സാധാരണ കാരണങ്ങൾ ഇവയാണ്:

* പുകവലി, മദ്യപാനം തുടങ്ങിയ അനാരോഗ്യകരമായ ജീവിതശൈലി പ്രവർത്തനങ്ങൾ
* അമിതമായ കാപ്പി കുടിയും കാർബോഹൈഡ്രേറ്റ് അടങ്ങിയ ഭക്ഷണക്രമവും
* ഇനാമലിന്റെ കട്ടി കുറയുന്നത്
* മരുന്ന് കഴിക്കേണ്ട ആരോഗ്യപ്രശ്നങ്ങൾ, അവയ്ക്ക് ആവശ്യമായ മരുന്നുകളിലെ രാസവസ്തുക്കൾ എന്നിവ പല്ലുകളോട് മോശമായി പ്രതികരിക്കും
* വാർദ്ധക്യം പല്ലുകളുടെ നിറം മാറാൻ കാരണമാകും

ആരോഗ്യമുള്ള വെളുത്ത പല്ലുകൾ ലഭിക്കുന്നതിനുള്ള പൊടിക്കൈകൾ

1.ആപ്പിൾ സിഡർ വിനാഗിരി: പബ്മെഡ് സെൻട്രലിൽ പ്രസിദ്ധീകരിച്ച ഒരു പഠനമനുസരിച്ച്, ആപ്പിൾ സിഡർ വിനാഗിരിയുടെ സഹായത്താൽ പല്ലുകളുടെ വെളുപ്പ് നിറം തിരികെ കൊണ്ടുവരാൻ സാധിക്കുമെന്ന് തെളിഞ്ഞിട്ടുണ്ട്. എന്നിരുന്നാലും, ഇതിന്റെ ഉപയോഗം കുറഞ്ഞ അളവിൽ ആയിരിക്കണം, മാത്രമല്ല ഇത് പല്ലിന്റെ ഉപരിതലത്തെ തകർക്കുന്നതിനാൽ പതിവായി ഉപയോഗിക്കുവാൻ പാടുള്ളതല്ല.
തലവേദന അകറ്റാൻ ഈ അവശ്യ എണ്ണകൾ സഹായത്തിനെത്തും
2. പല്ലു തേക്കുക: പല്ലുകൾ ആരോഗ്യകരമായി നിലനിർത്തുന്നതിന് രണ്ടോ മൂന്നോ മിനിറ്റ് വീതം ദിവസത്തിൽ രണ്ടുതവണയെങ്കിലും ബ്രഷ് ചെയ്യുന്നത് ഉറപ്പാക്കുക. നിങ്ങളുടെ വായയുടെ എല്ലാ ഭാഗങ്ങളും നാക്കും വൃത്തിയാക്കുക. പല്ലുകൾ വെളുപ്പിക്കുന്നതിനുള്ള ടൂത്ത് പേസ്റ്റ് നിങ്ങൾക്ക് ഇതിനായി ഉപയോഗിക്കാവുന്നതാണ്.

3. ആരോഗ്യകരമായ ഭക്ഷണക്രമം: വിറ്റാമിൻ സി, ഫൈബർ, പഴങ്ങൾ, പച്ചക്കറികൾ എന്നിവ അടങ്ങിയ ഭക്ഷണങ്ങൾ കഴിക്കുക. ഇത് നിങ്ങളുടെ പല്ലിന്റെ ആരോഗ്യവും മൊത്തത്തിലുള്ള ശരീരത്തിന്റെ ക്ഷേമവും നിലനിർത്താൻ സഹായിക്കും. സരസഫലങ്ങൾ, കാപ്പി, ബീറ്റ്റൂട്ട് തുടങ്ങിയ പല്ലിന് കറ വരുത്തുന്ന ഭക്ഷണപദാർത്ഥങ്ങൾ ഒഴിവാക്കുക.

4. ആക്റ്റിവേറ്റഡ് ചാർക്കോൾ: ടൂത്ത് പേസ്റ്റ് നിർമ്മിക്കുന്ന വിവിധ കമ്പനികൾ ആക്റ്റിവേറ്റഡ് ചാർക്കോൾ അഥവാ കരി അടങ്ങിയ ടൂത്ത് പേസ്റ്റുകളുടെ ഒരു ശ്രേണി തന്നെ വിപണിയിൽ എത്തിക്കുന്നുണ്ട് ഇപ്പോൾ. ഇത് പല്ലുകൾ വെളുപ്പിക്കാനും കറ നീക്കം ചെയ്യാനും സഹായിക്കുന്ന ഒരു പ്രധാന ഘടകമാണ്. കാപ്സ്യൂളുകളുടെ രൂപത്തിൽ ലഭിക്കുന്ന ആക്റ്റിവേറ്റഡ് ചാർക്കോൾ ഉപയോഗിച്ച് പല്ലിൽ തേച്ച് പിന്നീട് കഴുകിക്കളയാവുന്നതുമാണ്.

5. ഹൈഡ്രജൻ പെറോക്സൈഡും ബേക്കിംഗ് സോഡയും: പല്ലുകളുടെ മഞ്ഞ നിറവും കറകളും ഒഴിവാക്കാൻ ഹൈഡ്രജൻ പെറോക്സൈഡ്, ബേക്കിംഗ് സോഡ എന്നിവയുടെ സംയോജനം ഉപയോഗപ്രദമാണ്. ഹൈഡ്രജൻ പെറോക്സൈഡ്, ബേക്കിംഗ് സോഡ എന്നിവ അടങ്ങിയ ടൂത്ത് പേസ്റ്റ് ഇതിനായി നിങ്ങൾക്ക് ഉപയോഗിക്കാം, അല്ലെങ്കിൽ രണ്ട് ടേബിൾസ്പൂൺ ഹൈഡ്രജൻ പെറോക്സൈഡ് ഒരു ടേബിൾ സ്പൂൺ ബേക്കിംഗ് സോഡയുമായി ചേർത്ത് നിങ്ങൾക്ക് വീട്ടിൽ തന്നെ ഒരു പേസ്റ്റ് തയ്യാറാക്കി പല്ലു തേക്കാവുന്നതാണ്.

ശ്രദ്ധിക്കുക: ഈ ലേഖനത്തിൽ പരാമർശിച്ചിരിക്കുന്ന നുറുങ്ങുകളും നിർദ്ദേശങ്ങളും പൊതുവായ വിവര ആവശ്യങ്ങൾക്ക് മാത്രമുള്ളതാണ്, മാത്രമല്ല ഇത് ഒരു വിദഗ്‌ദ്ധ വൈദ്യോപദേശത്തിന് പകരമായി കണക്കാക്കരുത്. ഏതെങ്കിലും ഫിറ്റ്നസ് പ്രോഗ്രാം ആരംഭിക്കുന്നതിനോ ഭക്ഷണക്രമത്തിൽ എന്തെങ്കിലും മാറ്റങ്ങൾ വരുത്തുന്നതിനോ മുൻപായി എല്ലായ്പ്പോഴും നിങ്ങളുടെ ഡോക്ടറുമായോ ഡയറ്റീഷ്യനോടോ ബന്ധപ്പെടുക.

Summary: Do yellow teeth make you less confident? Here are some powders to get rid of yellow color