---

വടകര: സി.പി.ഐ.എം 24-)ാം പാര്‍ട്ടി കോണ്‍ഗ്രസിന്‌ മുന്നോടിയായുള്ള ജില്ലാ സമ്മേളനത്തിന് വടകരയില്‍ നാളെ തുടക്കമാവും. സമ്മേളനത്തിന്റെ ഭാഗമായി വടകരയില്‍ വിപുലമായ പരിപാടികളാണ് നടന്നുകൊണ്ടിരിക്കുന്നത്. സെമിനാറുകളും, പ്രഭാഷണങ്ങളും അടക്കം ഇതിനോടകം നിരവധി പരിപാടികള്‍ നടന്നുകഴിഞ്ഞു.

22 ലോക്കല്‍ കമ്മിറ്റികളുടെ നേതൃത്വത്തില്‍ ഇതുവരെയായി 25 സെമിനാറുകള്‍ നടന്നു. 14ന് ആരംഭിച്ച പരിപാടികള്‍ തുടര്‍ന്നുകൊണ്ടിരിക്കുകയാണ്. നഗരസഭാ സാംസ്‌കാരിക ചത്വരത്തില്‍ 30ന് ‘ഗാന്ധി വധത്തിന്റെ രാഷ്ട്രീയമാനങ്ങള്‍’ എന്ന വിഷയത്തെ മുന്‍നിര്‍ത്തി നടക്കുന്ന ചര്‍ച്ചയോടെ സാംസ്‌കാരിക സായാഹ്നം സമാപിക്കും.

31ന് നടക്കുന്ന റെഡ് വളന്റിയര്‍ മാര്‍ച്ചില്‍ അരലക്ഷം പ്രവര്‍ത്തകര്‍ പങ്കെടുക്കുമെന്നാണ് വിവരം. മൂന്ന് കേന്ദ്രങ്ങളില്‍ നിന്നായി ആരംഭിക്കുന്ന മാര്‍ച്ച് നാരായണനഗരത്തിലെ പൊതുസമ്മേളന നഗരിയില്‍ സംഗമിക്കും. പേരാമ്പ്ര, ബാലുശ്ശേരി, തിരുവമ്പാടി, താമരശ്ശേരി ഏരിയകളുടെ മാര്‍ച്ച് മേപ്പയില്‍ ഓവുപാലത്തിന് സമീപത്ത് നിന്നും വടകര, ഒഞ്ചിയം, നാദാപുരം, കുന്നുമ്മല്‍ തുടങ്ങിയ ഏരിയകളുടെ മാര്‍ച്ച് കരിമ്പനപ്പാലത്ത് നിന്നും ആരംഭിക്കും.

സീതാറം യെച്ചൂരി നഗറില്‍ ചേരുന്ന പൊതുസമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. പൊളിറ്റ് ബ്യൂറോ അംഗം എ.വിജയരാഘവന്‍, കേന്ദ്രകമ്മിറ്റി അംഗങ്ങളായ ഇ.പി ജയരാജന്‍, പി.കെ ശ്രീമിത, എ.കെ ബാലന്‍, എളമരം കരീം, പി.സതീദേവി, സംസ്ഥാന സെക്രട്ടറിയേറ്റ് അംഗങ്ങളായ ടി.പി രാമകൃഷ്ണന്‍, ആനാവൂര്‍ നാഗപ്പന്‍, പുത്തലത്ത് ദിനേശന്‍, പി.എം മുഹമ്മദ് റിയാസ്, പി.കെ ബിജു എന്നിവര്‍ പങ്കെടുക്കും.

സമ്മേളന നഗരിയിൽ ഇന്ന് വൈകിട്ട് ദീപശിഖ ജ്വലിപ്പിക്കും. ഒഞ്ചിയം രക്തസാക്ഷി സ്ക്വയറിൽ ഒഞ്ചിയം രക്തസാക്ഷി മേനോൻ കണാരന്റെ മകൾ റാണി ജാഥാ ലീഡർ ജില്ലാ സെക്രട്ടറിയേറ്റ് അംഗം കെ.കെ മുഹമ്മദിന് ദീപശിഖ കൈമാറും. പകൽ മൂന്നിന് ആരംഭിക്കുന്ന ദീപശിഖാ പ്രയാണത്തിൽ നൂറുകണക്കിന് കായികതാരങ്ങൾ റാലിയായി വടകര നാരായണ നഗറിൽ എത്തിക്കും. ഒഞ്ചിയം ബാങ്ക്, ഒഞ്ചിയം റെയിൽവേ ​ഗേറ്റ്, കണ്ണൂക്കര, കേളു ബസാർ, മടപ്പള്ളി നാദാപുരം റോഡ്, കെ ടി ബസാർ, കൈനാട്ടി, ചോറോട്, പെരുവാട്ടും താഴ, അഞ്ചുവിളക്ക്, പഴയ സ്റ്റാൻഡ്, എടോടി തുടങ്ങി വഴിനീളെ അഭിവാദ്യം ഏറ്റുവാങ്ങിയാണ് ദീപശിഖാജാഥ വൈകീട്ട് ആറോടെ സമ്മേളന നഗരിയിൽ എത്തുക.

Description: CPIM district conference starts tomorrow