ചേലക്കര: മൂന്നാം തവണയും എൽഡിഎഫ് സർക്കാർ അധികാരത്തിൽ വരുമെന്നതിന്റെ തെളിവാണ് ചേലക്കരയെന്ന് ആലത്തൂർ എംപി കെ രാധാകൃഷ്ണൻ. ചേലക്കരയിൽ ജനങ്ങൾ എല്ലാ കള്ളപ്രചരണങ്ങളെയും അതിജീവിച്ചു. ചേലക്കരയിൽ എൽഡിഎഫ് സ്ഥാനാർത്ഥി യു ആർ പ്രദീപ് 8000ത്തിലധികം വോട്ടുകൾക്ക് മുന്നിലെത്തിയതിന് പിന്നാലെ മാധ്യമങ്ങളോട് പ്രതികരിക്കുകയായിരുന്നു അദ്ദേഹം.

ജനങ്ങൾ ഇടതുപക്ഷത്തിന്റെ പിന്നിൽ ഉറച്ച് നിൽക്കുന്നുവെന്ന് പ്രാഥമികമായി ലഭിച്ച കണക്കുകളിൽ നിന്ന് മനസിലാക്കാം. ചേലക്കരയിൽ തിരഞ്ഞെടുപ്പ് വിജയിക്കുകയെന്നത് ജീവൻ മരണ പോരാട്ടമായാണ് കോൺഗ്രസ് കണ്ടത്. ചേലക്കര വിജയിക്കാൻ കഴിഞ്ഞാൽ അടുത്ത തിരഞ്ഞെടുപ്പിൽ യുഡിഎഫിന് വലിയ ഗുണം ചെയ്യുമെന്ന പ്രതീക്ഷയോട് കൂടി എല്ലാതരത്തിലുമുള്ള കള്ളപ്രചരണങ്ങളും ഇവിടെ പ്രചരിപ്പിക്കുകയുണ്ടായി. അതിനെയെല്ലാം അതിജീവിച്ച് കൊണ്ടാണ് ജനങ്ങൾ ഇടതുപക്ഷത്തിന്റെ പിന്നിൽ അണിനിരന്നതെന്നും അദ്ധേഹം പറഞ്ഞു.