യാത്രക്കാരുടെ ശ്രദ്ധയ്ക്ക്; കൊയിലാണ്ടിയിൽ നാളെ സൂചനാ ബസ് പണിമുടക്ക്
കൊയിലാണ്ടി: നാളെ കൊയിലാണ്ടിയില്‍ സംയുക്ത ട്രേഡ് യൂണിയന്‍ നേതൃത്വത്തില്‍ ബസ് തൊഴിലാളികള്‍ സൂചനാ പണിമുടക്ക് നടത്തും. ഫെബ്രുവരി 17 ന് കൊയിലാണ്ടി ചെങ്ങോട്ട് കാവില്‍ വെച്ച് സര്‍വീസ് റോഡില്‍ നിന്നും ബൈക്കിന് സൈഡ് നല്‍കിയില്ല എന്ന് പറഞ്ഞ് ബസിലെ തൊഴിലാളികളെ ഒരു കൂട്ടം ആളുകള്‍ മര്‍ദ്ദിച്ചതില്‍ പോലീസില്‍ പരാതിപ്പെട്ടിട്ടും ഒരു നടപടിയും ഉണ്ടായിട്ടില്ലെന്നാരോപിച്ചാണ് പണിമുടക്ക്.
ഈ സംഭവത്തില്‍ പ്രതികളെ ആരെയും അറസ്റ്റ് ചെയ്യാത്ത പോലീസ് നടപടിയില്‍ പ്രതിഷേധിച്ചാണ് സംയുക്ത ട്രേഡ് യൂണിയന്‍ നേതൃത്വത്തില്‍ തൊഴിലാളികള്‍ സമരം പ്രഖ്യാപിച്ചിരിക്കുന്നത്. നാളെ എസ്.എസ്.എല്‍.സി പരീക്ഷ തുടങ്ങാനിരിക്കെയാണ് സമര പ്രഖ്യാപനം.
അതേസമയം പ്രതികളെ അറസ്റ്റ് ചെയ്താല്‍ സമരം പിന്‍വലിക്കുമെന്നും വിദ്യാര്‍ത്ഥികളെ ബുദ്ധിമുട്ടിക്കുവാന്‍ താത്പര്യമില്ലെന്നും സംയുക്ത ട്രേഡ് യൂണിയന്‍ വ്യക്തമാക്കി. നാളെ രാവിലെ 6 മുതല്‍ വൈകീട്ട് ആറ് വരെയാണ് സമരം. ഇതിനിടയില്‍ പോലീസ് വേണ്ട നടപടികള്‍ സ്വീകരിച്ചാല്‍ സമരം പിന്‍വലിയ്ക്കാന്‍ യോഗത്തില്‍ തീരുമാനമായി.