മുക്കം: കാരശ്ശേരി തേക്കുംകുറ്റിയില്‍ ആളില്ലാത്ത വീട് കുത്തിത്തുറന്ന് മോഷണം. കാരശ്ശേരി സ്വദേശി സെബിന്‍ അഗസ്റ്റിന്റെ വീട്ടിലാണ് മോഷണം നടന്നത്. വീട്ടുകാര്‍ ആശുപത്രിയില്‍ പോയി മടങ്ങിവന്നപ്പോഴാണ് മോഷണം നടന്ന വിവരം അറിയുന്നത്.

ആശുപത്രി ആവശ്യത്തിനായി ശനിയാഴ്ച ഉച്ചയോടെ വീട്ടുകാര്‍ വീടും മുന്‍വശത്തെ ഗേറ്റും പൂട്ടി പോയതായിരുന്നു. ഇന്നലെ ഉച്ചയോടെ വീട്ടുകാര്‍ വീട്ടിലെത്തിയപ്പോള്‍ വീട് കുത്തിത്തുറന്ന നിലയിലായിരുന്നു. കുറച്ച് പണവും ഒരു പവനോളം വരുന്ന സ്വര്‍ണാഭരണവും നഷ്ടപ്പെട്ടിട്ടുണ്ട്. അലമാരികളെല്ലാം കുത്തിപ്പൊളിച്ച് സാധനങ്ങളെല്ലാം വലിച്ചുവാരിയിട്ട നിലയിലായിരുന്നു. മുക്കം പൊലീസില്‍ പരാതി നല്‍കിയിട്ടുണ്ട്.

പൊലീസ് അന്വേഷണം ആരംഭിച്ചു. കോഴിക്കോട് നിന്നും ഡോഗ് സ്‌ക്വാഡ് സ്ഥലത്തെത്തി പരിശോധന നടത്തി. സമീപത്തെ സി.സി.ടി.വി ദൃശ്യങ്ങളുള്‍പ്പെടെ പൊലീസ് പരിശോധിക്കുന്നുണ്ട്.

Summary: Burglary of an unoccupied house in Karassery; Gold and money lost