കോഴിക്കോട്: കോഴിക്കോട് ബീച്ചിൽ പോത്തുകളുടെ ആക്രമണത്തിൽ ആറ് വയസ്സുകാരിക്ക് പരിക്കേറ്റു. മലപ്പുറം മോങ്ങം സ്വദേശി യാസർ അറാഫത്തിൻറെ മകൾ ഇസ മെഹക്കിനാണ് പരിക്കേറ്റത്. ഇന്നലെ രാത്രി എട്ടോടെ ബീച്ചിലെ ഓപ്പൺ സ്റ്റേജിന് സമീപമാണ് ആക്രമണമുണ്ടായത്.

രണ്ട് പോത്തുകൾ പെട്ടെന്ന് ആളുകൾക്കിടയിലേക്ക് എത്തുകയായിരുന്നു. ഇതിൽ ഒരു പോത്ത് കടലിൽ കളിച്ച് കരയിലേക്ക് കയറി നിന്ന കുട്ടികൾക്കിടയിലേക്ക് ചെന്ന് ആക്രമിച്ചു. കുത്തേറ്റ് നിലത്തുവീണ കുട്ടിയുടെ വാരിയെല്ലിന് സമീപം പോത്ത് ചവിട്ടുകയായിരുന്നു. മറ്റ് കുട്ടികളെയും ആക്രമിക്കാൻ ഒരുങ്ങിയപ്പോൾ ബന്ധുക്കളും മറ്റുള്ളവരും ചേർന്ന് ബഹളമുണ്ടാക്കി പോത്തുകളെ ഓടിച്ചു.