മണിയൂർ: മണിയൂർ ഗ്രാമപഞ്ചായത്ത് 2024-2025 വർഷത്തെ പദ്ധതിയിൽ ഉൾപ്പെടുത്തി നടപ്പാക്കിയ ജനകീയ ജൈവവൈവിധ്യ രജിസ്റ്ററിന്റെ രണ്ടാം ഭാഗത്തിന്റെ പ്രകാശനം ജില്ലാ കളക്ടർ സ്നേഹിൽ കുമാർ സിംഗ് നിർവഹിച്ചു. 50 ഓളം സന്നദ്ധ പ്രവർത്തകർ പഞ്ചായത്തിലെ 21 വാർഡുകളിൽ നിന്നും ശേഖരിച്ച വിവരങ്ങൾ ക്രോഡീകരിച്ചു കൊണ്ടാണ് സമ്പൂർണ്ണ ജൈവ വൈവിധ്യ രജിസ്റ്ററിന്റെ രണ്ടാം ഭാഗം പ്രസിദ്ധീകരിച്ചിട്ടുള്ളത്.

മണിയൂർ ഗ്രാമപഞ്ചായത്ത് പ്രസിഡന്റ്‌ ടി.കെ അഷറഫ്‌ അധ്യക്ഷത വഹിച്ച പരിപാടിയിൽ സസ്യ ഗവേഷകൻ ഡോ ദിലീപ് പി രജിസ്റ്റർ പരിചയപ്പെടുത്തി. കാലാവസ്ഥ വ്യതിയാനം മൂലം പ്രകൃതിയിൽ സംഭവിച്ചുകൊണ്ടിരിക്കുന്ന മാറ്റങ്ങൾ, സസ്യ ജന്തുജാലങ്ങളിൽ ഉണ്ടായിക്കൊണ്ടിരിക്കുന്ന പ്രത്യേകതകൾ ഇവയെല്ലാം ആധികാരികമായി തന്നെ പി.ബി.ആറില്‍ ഉൾപ്പെടുത്തിയിട്ടുണ്ട്. മണിയൂരിലെ നദികൾ, അവയിലെ മത്സ്യസമ്പത്ത്, സസ്യ ജന്തുജാലങ്ങളിൽ കാണുന്ന വൈവിധ്യങ്ങൾ, അധിനിവേശ സസ്യങ്ങൾ, കാവുകൾ, വയലുകൾ, പക്ഷിസങ്കേതങ്ങൾ ഇവയെല്ലാം ചരിത്രരേഖയിൽ അടയാളപ്പെടുത്തിയിട്ടുണ്ട്.

സംസ്ഥാന ഔഷധ സസ്യബോർഡ് എക്‌സിക്യുട്ടീവ് മെമ്പർ കെ വി ഗോവിന്ദൻ, കെഎസ്ബിബി കോർഡിനേറ്റർ ഡോ. മഞ്ജു ധനീഷ്, മണിയൂർ ഗ്രാമപഞ്ചായത്ത് വൈസ് പ്രസിഡണ്ട് എം ജയപ്രദ, ആരോഗ്യ വിദ്യാഭ്യാസ സ്റ്റാൻ്റിംഗ് കമ്മിറ്റി ചെയർമാൻ കെ ശശിധരൻ, മെമ്പർമാരായ പ്രമോദ് മൂഴിക്കൽ, പ്രമോദ് കോണിച്ചേരി ഷൈനി വി എം എന്നിവർ പങ്കെടുത്തു. ഗ്രാമപഞ്ചായത്ത് സെക്രട്ടറി അൻസാർ കെ സ്വാഗതവും വിജയൻ മാസ്റ്റർ നന്ദിയും പറഞ്ഞു.

Description: Biodiversity Registry of Maniyur Grama Panchayat released