അരിക്കുളം: സ്വാതന്ത്ര്യ സമര സേനാനിയും ഇന്ത്യൻ നാഷണൽ കോൺ​ഗ്രസ് നേതാവും ജന്മിത്വവിരുദ്ധ പോരാളിയുമായിരുന്ന എ.കെ. കൃഷ്ണൻ മാസ്റ്ററുടെ 29ാം ചരമവാർഷികാചരണത്തിന്റെ ഭാ​ഗമായി ഊരള്ളൂരിൽ സ്മൃതി സം​ഗമം സംഘടിപ്പിച്ചു. ഡി.സി.സി പ്രസിഡന്റ് അഡ്വ. കെ. പ്രവീൺകുമാർ ഉദ്ഘാടനം ചെയ്തു. ഫാസിസത്തെ പ്രതിരോധിക്കാൻ മതനിരപേക്ഷതയുടെയും മനുഷ്യസ്നേഹത്തിന്റെയും പ്രതീകമായ എ.കെ. കൃഷ്ണൻ മാസ്റ്ററുടെ ചിന്തകളെയും പ്രവർത്തനങ്ങളെയും പിന്തുടരണമെന്നും ബുദ്ധിയും പ്രായോ​ഗികതയും ഒരുമിച്ചു ചേർന്ന അപൂർവ്വ പ്രതിഭയായിരുന്നു അദ്ദേഹമെന്നും പരിപാടി ഉദ്ഘാടനം ചെയ്ത് സംസാരിച്ച പ്രവീൺകുമാർ പറഞ്ഞു.

നിസ്വാർത്ഥനായ പൊതുപ്രവർത്തകനും മികച്ച അധ്യാപകനുമായിരുന്ന അദ്ദേഹത്തിൽ നിന്നും പുതിയ തലമുറക്ക് നിരവധി കാര്യങ്ങൾ പഠിക്കാനുണ്ടെന്നും പ്രവീൺകുമാർ കൂട്ടിച്ചേർത്തു.

അരിക്കുളം മണ്ഡലം കോൺ​ഗ്രസ് കമ്മിറ്റി പ്രസിഡന്റ് ശശി ഊട്ടേരി, കെ.പി. രാമചന്ദ്രൻ മാസ്റ്റർ, സി. സുകുമാരൻ മാസ്റ്റർ, കെ.കെ. നാരായണൻ മാസ്റ്റർ, കോട്ടിൽ ഇമ്പിച്ച്യാമ്മദ് മാസ്റ്റർ, കുയ്യേൽ ഖണ്ഡി ശ്രീധരൻ മാസ്റ്റർ, എൻ.പി. ഉണ്ണി മാസ്റ്റർ, ജാനകി ടീച്ചർ, രാജേഷ് കീഴരിയൂർ, സ്വാ​ഗത സംഘം ചെയർമാൻ സത്യൻ തലയഞ്ചേരി, കൺവീനർ സുമേഷ് സുധർമൻ, ട്രഷറർ ടി.ടി. ശങ്കരൻ നായർ, ചിത്ര സി. പൂത്തൂർ, ഇ.കെ. ഭാസ്കരൻ, സി. രാമദാസ് എന്നിവർ പ്രസം​ഗിച്ചു.