നാദാപുരം: വളയം പോലീസ് സ്റ്റേഷൻ പരിധിയിലെ ചെക്യാട് വൻ ബോംബ് ശേഖരം കണ്ടെത്തി. കായലോട്ട് താഴെ പാറച്ചാലിൽ മുക്കിൽ ബിഎസ്എഫ് റോഡിലെ കലുങ്കിന് താഴെ നിന്നാണ് ബോംബുകളും വടിവാളുകളും കണ്ടെത്തിയത്. ഇന്ന് വൈകുന്നേരം 5 മണിയോടെയാണ് സംഭവം.

കലുങ്കിനടിയിൽ സൂക്ഷിച്ച നിലയിൽ 14 സ്റ്റീൽ ബോംബുകൾ, രണ്ട് പൈപ്പ് ബോംബുകൾ, രണ്ട് വടിവാളുകൾ എന്നിവയാണുണ്ടായിരുന്നത്. രഹസ്യ വിവരത്തെ തുടർന്ന് വളയം എസ്ഐ എം മോഹനൻറെ നേതൃത്വത്തിൽ പോലീസും, ബോംബ് സ്ക്വാഡും നടത്തിയ പരിശോധനയിലാണ് കണ്ടെത്തിയത്. ബോംബും ആയുധങ്ങളും പോലീസ് കസ്റ്റഡിയിൽ എടുത്തു. മേഖലയിൽ വളയം പോലീസ് പരിശോധന തുടരുകയാണ്.