കടമേരി: കോഴിക്കോട് റീൽസ് ചിത്രീകരണത്തിനിടെ കാറിടിച്ച് മരിച്ച ആൽവിന്റെ സംസ്ക്കാരം നാളെ നടക്കും. ഉച്ചയ്ക്ക് രണ്ട് മണിയോടെ കടമേരിയിലെ സ്വവസതിയിലാണ് സംസ്ക്കാര ചടങ്ങുകൾ നടക്കുക. കാറടപകടത്തിൽ ​ഗുരുതരമായി പരിക്കേറ്റ ആൽവിൻ കോഴിക്കോട് സ്വകാര്യ ആശുപത്രിയിൽ ചികിൽസയിലിരിക്കെ ഇന്ന് രാവിലെ പതിനൊന്ന് മണിയോടെയാണ് മരിച്ചത്.

തച്ചിലേരി താഴെക്കുനി ഹൗസിൽ സുരേഷ് ബാബു- സിന്ധു ദമ്പതികളുടെ ഏകമകനാണ് മരിച്ച ആൽവിൻ. ആൽവിന്റെ മരണത്തോടെ ഈ കുടുംബത്തിന്റെ പ്രതിക്ഷകളാണ് മങ്ങിയത്. വിസിറ്റിംങ് വിസയിൽ ​ഗൾഫിലേക്ക് പോയ ആൽവിൻ ഒരു മാസമായിട്ടില്ല നാട്ടിലെത്തിയിട്ടെന്ന് അയൽവാസി നാണു വടകര ഡോട് ന്യൂസിനോട് പറഞ്ഞു. ഒന്നരമാസം ​ഗൾഫിൽ നിന്നിരുന്നു. വീഡിയോ​ഗ്രാഫറായിരുന്നു ആൽവിനെന്നും അദ്ധേഹം പറഞ്ഞു.

കോഴിക്കോട്ടെ ഒരു സ്വകാര്യ കമ്പനിക്ക് വേണ്ടി പ്രെമോഷൻ വീഡിയോ എടുക്കുന്നതിനിടെ ചിത്രീകരണത്തിന് വേണ്ടി ഉപയോ​ഗിച്ച കാർ അമിതവേ​ഗതയിലെത്തി ആൽവിനെ ഇടിക്കുകയായിരുന്നു. വെള്ളയിൽ പോലിസ് സ്റ്റേഷന് സമീപം രാവിലെയായിരുന്നു അപകടം. കാർ പോലിസ് കസ്റ്റഡിയിലെടുത്തു.