കോഴിക്കോട്: കോഴിക്കോട് രാമനാട്ടുകരയിലെ മേൽപ്പാലത്തിന് സമീപം വെച്ച് കഞ്ചാവുമായി കഴിഞ്ഞ ദിവസം പിടികൂടിയ പ്രതിയെ ചോദ്യം ചെയ്തപ്പോൾ താമസ സ്ഥലത്തും ലഹരിമരുന്ന് സൂക്ഷിച്ചതായി വിവരം ലഭിച്ചു. തുടർന്ന് ഇയാൾ താമസിക്കുന്ന കുറ്റിക്കാട്ടൂരിലെ വാടക കെട്ടിടത്തിലെ മുറിയിൽ നിന്ന് കഞ്ചാവ് കണ്ടെടുത്തു. ഏഴ് കിലോ മുന്നൂറ് ഗ്രാം കഞ്ചാവാണ് പിടികൂടിയത്.

കാസർകോട് ബദിയടുക്ക കോബ്രജ ഹൗസിൽ ശ്രീജിത്താണ് കഴിഞ്ഞ ദിവസം രണ്ട് കിലോ കഞ്ചാവുമായി പിടിയിലായത്. ഇയാളെ ചോദ്യം ചെയ്തതിൽ നിന്നാണ് താമസസ്ഥലത്ത് കഞ്ചാവ് സൂക്ഷിച്ചിട്ടുണ്ട് എന്ന വിവരം ഫറോക്ക് പൊലീസിനും ഡാൻസാഫിനും ലഭിച്ചത്. തുടർന്ന് പ്രതിയെ കുറ്റിക്കാട്ടൂരിലെ സ്വകാര്യ കെട്ടിടത്തിൽ എത്തിച്ച് മുറി തുറന്നു പരിശോധിക്കുകയായിരുന്നു.

പൊതിഞ്ഞുവെച്ച നിലയിലായിരുന്നു ഏഴ് കിലോ മുന്നൂറ് ഗ്രാം വരുന്ന കഞ്ചാവ്. വലിയതോതിൽ കഞ്ചാവ് കൊണ്ടുവന്ന് കോഴിക്കോട്ടെ ആവശ്യക്കാർക്ക് വിതരണം ചെയ്യുന്നതാണ് ഇയാളുടെ രീതി. വാട്സ് ആപ് വഴിയാണ് ആവശ്യക്കാർ ഇയാളെ ബന്ധപ്പെടാറുള്ളത്.