സ്‌കൂള്‍ കെട്ടിടത്തിന് ഫിറ്റ്‌നസ് കിട്ടിയില്ല: അരിക്കുളം എല്‍.പി സ്‌കൂള്‍ ഭാവന ഗ്രന്ഥാലയത്തിലേക്ക് മാറ്റി
അരിക്കുളം: സ്‌കൂള്‍ കെട്ടിടം പൊളിഞ്ഞുവീഴാറായ അവസ്ഥയിലായതിനാല്‍ അരിക്കുളം എല്‍.പി സ്‌കൂളിന് തുറന്നുപ്രവര്‍ത്തിക്കാന്‍ ഫിറ്റ്‌നസ് ലഭിച്ചില്ല. ഇതേത്തുടര്‍ന്ന് സമീപത്തെ ഭാവന ഗ്രന്ഥാലയത്തിലേക്ക് സ്‌കൂളിന്റെ പ്രവര്‍ത്തനം മാറ്റി.
58 കുട്ടികളാണ് ഈ സ്‌കൂളില്‍ പഠിക്കുന്നത്. പൊളിഞ്ഞുവീഴാറായ കെട്ടിടം മാറ്റിപ്പണിയണമെന്ന ആവശ്യം രക്ഷിതാക്കളില്‍ നിന്നും പ്രദേശവാസികളില്‍ നിന്നും പലതവണ ഉയര്‍ന്നിരുന്നു. എന്നാല്‍ മാനേജ്‌മെന്റ് ഇത് ചെവിക്കൊണ്ടില്ല. ഈ സാഹചര്യത്തിലാണ് ഇപ്പോള്‍ സ്‌കൂളിന്റെ പ്രവര്‍ത്തനം സമീപത്തെ ഗ്രന്ഥാലയത്തിലേക്ക് മാറ്റേണ്ടിവന്നത്.
ഭാവന ഗ്രന്ഥാലയത്തില്‍ ഇന്ന് നടന്ന പ്രവേശനോത്സവം അരിക്കുളം ഗ്രാമ പഞ്ചായത്ത് പ്രസിഡന്റ് എ. എം സുഗതന്‍ മാസ്റ്റര്‍ ഉദ്ഘാടനം ചെയ്തു. പി ടി എ പ്രസിഡന്റ് ഗിരീഷ് എടവന അധ്യക്ഷത വഹിച്ചു. ഗ്രാമ പഞ്ചായത്ത് അംഗങ്ങളായ ബിന്ദു പറമ്പടി, ശ്യാമള ഇടപ്ലപ്പള്ളി, ഭാവന ഗ്രഥാലയം സെക്രട്ടറി പി കെ ഷൈലേഷ്, സ്‌കൂള്‍ ഹെഡ് മാസ്റ്റര്‍ ഷിംജിത്ത് എന്നിവര്‍ സംസാരിച്ചു.