പയ്യോളി: കേരളത്തിലെ ഏറ്റവും മികച്ച സ്കൂൾ പി.ടി.എ ക്കുള്ള പുരസ്കാരം പയ്യോളി ഹയർ സെക്കന്ററി സ്കൂൾ പി.ടി.എ ഏറ്റുവാങ്ങി. തിരുവനന്തപുരത്ത് പൊതുവിദ്യാഭ്യാസ ഡയരക്ടറുടെ ഓഫീസിൽ വെച്ചു നടന്ന ചടങ്ങിൽ ഡെപ്യൂട്ടി സ്പീക്കർ കെ.കെ.ശശി യിൽ നിന്നാണ് പി.ടി.എ പ്രതിനിധികൾ പുരസ്കാരം ഏറ്റുവാങ്ങിയത്.

പി.ടി.എ പ്രസിഡണ്ട് ബിജു കളത്തിൽ, എച്ച്.എം ബിനോയ് കുമാർ.കെ.എം, അജ്മൽ മാടായി, സതീഷ് കുമാർ എന്നിവർ ചേർന്നാണ് പുരസ്കാരം ഏറ്റുവാങ്ങിയത്. 2019-2020 അദ്ധ്യയന വർഷത്തിൽ പി.ടി.എ നടത്തിയ ശ്രദ്ധേയമായ ഇടപെടലുകളാണ് പുരസ്കാരത്തിന് അർഹമാക്കിയത്. അഞ്ച് ലക്ഷം രൂപയും സി.എച്ച്.മുഹമ്മദ് കോയ എവർറോളിംഗ്‌ ട്രോഫിയും പ്രശസ്തിപത്രവുമാണ് പുരസ്കാരമായി ലഭിച്ചത്.

കേരള സർക്കാരിൻ്റെ പൊതുവിദ്യാഭ്യാസ സംരക്ഷണയഞ്ജത്തിൻ്റെ ഭാഗമായുള്ള ഭൗതിക സാഹചര്യം മെച്ചപ്പെടുത്തുന്നതിനായി ജനകീയ പങ്കാളിത്തത്തോടെ ഫണ്ട് സമാഹരണം നടത്തി സ്കൂൾ വികസനത്തിനായി ശക്തമായ ഇടപെടലുകളാണ് പി.ടി.എ നേതൃത്വത്തിൽ നടത്തിയത്.