നടനും തിരക്കഥാകൃത്തുമായ പി.ബാലചന്ദ്രന് അന്തരിച്ചു
തിരുവനന്തപുരം: നടനും തിരക്കഥാകൃത്തും സംവിധായകനുമായ പി. ബാലചന്ദ്രന് അന്തരിച്ചു. 69 വയസ്സായിരുന്നു. എട്ടു മാസമായി മസ്തിഷ്കജ്വരത്തെത്തുടര്ന്ന് ചികിത്സയിലായിരുന്നു. വൈക്കം മുനിസിപ്പല് ചെയര്പേഴ്സണ് ആയിരുന്ന ശ്രീലതയാണ് ഭാര്യ. ശ്രീകാന്ത്, പാര്വതി എന്നിവര് മക്കളാണ്. സംസ്കാരം ഇന്ന് വൈകുന്നേരം മൂന്നു മണിക്ക് വൈക്കത്ത് വീട്ടുവളപ്പില് നടക്കും.
‘പാവം ഉസ്മാന്’ എന്ന നാടകത്തിലൂടെ ശ്രദ്ധ നേടി. 1989ലെ കേരള സാഹിത്യ അക്കാഡമി പുരസ്കാരം, കേരള പ്രൊഫഷണല് നാടക പുരസ്കാരം എന്നിവയുള്പ്പെടെ നിരവധി പുരസ്കാരങ്ങള്. എംജി സര്വകലാശാല സ്കൂള് ഓഫ് ലെറ്റേഴ്സില് അദ്ധ്യാപകനായിരുന്നു. ഏകാകി, ലഗോ, തീയേറ്റര് തെറാപ്പി, ഒരു മധ്യവേനല് പ്രണയരാവ്, ഗുഡ് വുമന് ഓഫ് സെറ്റ്സ്വാന് തുടങ്ങിയ നാടകങ്ങള് സംവിധാനം ചെയ്തു.
‘അങ്കിള് ബണ്’ എന്ന സിനിമയാണ് തിരക്കഥാകൃത്ത് എന്ന നിലയില് ആദ്യം പുറത്തിറങ്ങിയ സിനിമ. ഉള്ളടക്കം, പവിത്രം, തച്ചോളി വര്ഗീസ് ചേകവര്, മാനസം, കല്ല് കൊണ്ടൊരു പെണ്ണ്, പുനരധിവാസം, പോലീസ്, ഇവന് മേഘരൂപന്, കമ്മട്ടിപ്പാടം, എടക്കാട് ബറ്റാലിയന് തുടങ്ങിയ സിനിമകള് പിറന്നത് പി.ബാലചന്ദ്രന്റെ തൂലികയിലൂടെയാണ്. 2012ല് റിലീസ് ചെയ്ത ‘ഇവന് മേഘരൂപനി’ലൂടെ സംവിധായകന്റെ വേഷത്തിലേക്കുമെത്തി.
മികച്ച മലയാള ചിത്രത്തിനുള്ള ദേശീയ പുരസ്കാരം നേടിയ ‘പുനരധിവാസം’ മികച്ച കഥയ്ക്കും, മികച്ച നവാഗത സംവിധായകനുമുള്ള സംസ്ഥാന ചലച്ചിത്ര പുരസ്കാരങ്ങളും നേടി. 2016ല് തിരക്കഥയെഴുതി രാജീവ് രവി സംവിധാനം ചെയ്ത ‘കമ്മട്ടിപ്പാടം’, നാല് സംസ്ഥാന ചലച്ചിത്ര പുരസ്കാരങ്ങള് കരസ്ഥമാക്കി. നാല്പ്പതിലധികം ചിത്രങ്ങളില് അഭിനയിച്ചു.