തിരുവനന്തപുരം: കഴക്കൂട്ടത്ത് കാര്‍ ബൈക്കിലിടിച്ച് എം.ബി.ബി.എസ് വിദ്യാര്‍ത്ഥി മരിച്ചു. വെഞ്ഞാറമ്മൂട് ഗോകുലം മെഡിക്കല്‍ കോളേജിലെ വിദ്യാര്‍ത്ഥി നിതിന്‍ ഹരിയാണ് മരിച്ചത്.

ഒപ്പമുണ്ടായിരുന്ന സുഹൃത്ത് വിഷ്ണുവിനെ ആശുപത്രിയില്‍ പ്രവേശിപ്പിച്ചു. വിഷ്ണുവിന്റെ നില ഗുരുതരമായി തുടരുകയാണ്. നാലാം വര്‍ഷ എം.ബി.ബി.എസ് വിദ്യാര്‍ത്ഥികളാണ് ഇരുവരും.

പോത്തന്‍കോട് ചന്തവിളയില്‍ കിന്‍ഫ്രയ്ക്ക് സമീപത്ത് വച്ച് ഇന്ന് പുലര്‍ച്ചെ നാലരയോടെയാണ് അപകടം നടന്നത്. മദ്യലഹരിയില്‍ വാഹനമോടിച്ച ഇന്നോവ ഡ്രൈവര്‍, എം.ബി.ബി.എസ് വിദ്യാര്‍ഥികള്‍ സഞ്ചരിച്ച ബൈക്കില്‍ ഇടിക്കുകയായിരുന്നു എന്ന് പൊലീസ് പറഞ്ഞു.

എറണാകുളം ജില്ലയിലെ കോതമംഗലം സ്വദേശിയാണ് മരിച്ച നിതിന്‍ ഹരി. മൃതദേഹം തിരുവനന്തപുരം മെഡിക്കല്‍ കോളേജ് മോര്‍ച്ചറിയില്‍ സൂക്ഷിച്ചിരിക്കുകയാണ്.