തിരുവങ്ങൂരില്‍ ട്രെയിലറിന് പിറകില്‍ ഗുഡ്‌സ് ഓട്ടോ ഇടിച്ച് ഡ്രൈവര്‍ കുടുങ്ങിയ നിലയില്‍: രക്ഷകരായത് യാദൃശ്ചികമായെത്തിയ കൊയിലാണ്ടി ഫയര്‍ഫോഴ്‌സ് സംഘം
ചേമഞ്ചേരി: ട്രെയിലറിന് പിറകില്‍ ഇടിച്ച ഗുഡ്‌സ് ഓട്ടോയില്‍ കുടുങ്ങിയ ഡ്രൈവറെ ഫയര്‍ഫോഴ്‌സ് സംഘം രക്ഷിച്ചു. തിരുവങ്ങൂരിനു സമീപം ഇന്ന് രാവിലെ 5 മണിയോടെയായിരുന്നു സംഭവം.
പുലര്‍ച്ചെ വെങ്ങളത്ത് മറ്റൊരു അപകടം നടന്ന വിവരം ലഭിച്ചതിനെ തുടര്‍ന്നാണ് കൊയിലാണ്ടിയില്‍ നിന്നും ഫയര്‍ഫോഴ്‌സ് സംഘം വെങ്ങളത്തേക്ക് തിരിച്ചത്. ഇതിനിടയിലാണ് വഴിയില്‍ ഗുഡ്‌സ് വണ്ടി ട്രെയലറിന് പിറകില്‍ ഇടിച്ച നിലയിലും ഡ്രൈവര്‍ അതില്‍ കുടുങ്ങിക്കിടക്കുന്നതായും കണ്ടത്.
വെങ്ങളം സ്വദേശി പഞ്ചേഷ് ആണ് അപകടത്തില്‍പെട്ടത്. ഹൈഡ്രോളിക് കട്ടറിന്റെ സഹായത്തോടെ ഇയാളെ പുറത്തെടുത്ത് ഫയര്‍ഫോഴ്‌സിന്റെ ആംബുലന്‍സില്‍ കൊയിലാണ്ടി താലൂക്ക് ആശുപത്രിയില്‍ എത്തിച്ചു. ഇയാളുടെ പരുക്ക് ഗുരുതരമല്ല.
എസ്.എഫ്.ആര്‍.ഒ സജിചാക്കോയുടെ നേതൃത്വത്തില്‍ എഫ്.ആര്‍.ഒ മാരായ ഹേമന്ദ്, ഇര്‍ഷാദ്, ബബീഷ്, അമല്‍രാജ്, അരുണ്‍, രാകേഷ്, മനോജ് ഹോംഗാര്‍ഡായ ബാലന്‍ എന്നിവര്‍ രക്ഷാപ്രവര്‍ത്തനത്തില്‍ ഏര്‍പ്പെട്ടു.