ചെറുക്കാട് കെ.വി.എല്‍.പി സ്‌കൂളിന് പുതിയ കെട്ടിടമുയരും
കായണ്ണബസാര്‍: കായണ്ണ ഗ്രാമപഞ്ചായത്തിലെ ചെറുക്കാട് കെ.വി.എല്‍.പി സ്‌കൂളിന് പുതിയ കെട്ടിടമുയരും. കെ.എം സച്ചിന്‍ ദേവ് എം.എല്‍.എ പുതിയ കെട്ടിട നിര്‍മ്മാണത്തിന്റെ ശിലാസ്ഥാപന കര്‍മ്മം നിര്‍വ്വഹിച്ചു.
1948 ല്‍ ആണ് ചെറുക്കാട് കെ.വി.എല്‍.പി സ്‌കൂള്‍ പ്രവര്‍ത്തനമാരംഭിച്ചത്. അരനൂറ്റാണ്ടിലേറെ പഴക്കമുള്ള സ്‌കൂള്‍ കെട്ടിടം മാറ്റി സ്ഥാപിക്കണമെന്നുള്ള നാട്ടുകാരുടെ ആവശ്യം മാനേജ്‌മെന്റ് അംഗീകരിക്കുകയായിരുന്നു. രണ്ട് നിലയുള്ള പുതിയ കെട്ടിടമാണ് സ്‌കൂള്‍ മാനേജ്‌മെന്റിന്റെ നേതൃത്വത്തില്‍ പണി കഴിപ്പിക്കുന്നത്.
ഗ്രാമപഞ്ചായത്ത് പ്രസിഡണ്ട് സി.കെ.ശശി അദ്ധ്യക്ഷത വഹിച്ചു. എം.കെ വേലായുധന്‍ സി.പി.ബാലകൃഷ്ണന്‍, മെമ്പര്‍മാരായ എ.സി ശരണ്‍, ജയപ്രകാശ് എന്നിവരും ആശംസകള്‍ അര്‍പ്പിച്ചു സംസാരിച്ചു. സ്വാഗത സംഘം കണ്‍വീനര്‍ സി.ജി.രാജന്‍ സ്വാഗതം പറഞ്ഞു.