കുറ്റ്യാടിയില്‍ തേങ്ങാക്കൂടക്ക് തീ പിടിച്ചു
കുറ്റ്യാടി: കുറ്റ്യാടി കടേക്കച്ചാലില്‍ തേങ്ങാക്കൂടക്ക് തീ പിടിച്ചു. രണ്ടായിരം തേങ്ങയും വൈക്കോലും തേങ്ങാക്കൂട നിര്‍മ്മിക്കാന്‍ ഉപയോഗിച്ച മരങ്ങളും കത്തി നശിച്ചു. നാദാപുരത്തുനിന്ന് ഫയര്‍ ഫോഴ്‌സ് എത്തിയാണ് തീയണച്ചത്.
കടേക്കച്ചാലില്‍ പന്തലം കണ്ടി അസന്‍ ഹാജിയുടെ ഉടമസ്ഥതയിലുള്ളതാണ് തേങ്ങാക്കൂട. കൂട കത്തുന്നത് കണ്ട് ഓടിക്കൂടിയ പ്രദേശ വാസികളാണ് ആദ്യം രക്ഷാ പ്രവര്‍ത്തനം നടത്തിയത്. തുടര്‍ന്ന് ഫയര്‍ ഫോഴ്‌സിനെ വിവരമറിയിക്കുകയായിരുന്നു. നാദാപുരം ഫയര്‍ സ്റ്റേഷനില്‍ നിന്നെത്തിയ രണ്ട് യൂണിറ്റ് ഫയര്‍ എഞ്ചിന്‍ ഉപയോഗിച്ചാണ് തീ പൂര്‍ണ്ണമായും അണച്ചത്. ഇതേ തേങ്ങാക്കൂടക്ക് മുമ്പ് രണ്ട് തവണ തീ പിടിച്ചിരുന്നതായി നാട്ടുകാര്‍ പറഞ്ഞു.
സ്റ്റേഷന്‍ ഓഫീസര്‍ ജാഫര്‍ സാദിഖ്, എസ്.ടി.ഒ. നന്ദകുമാര്‍ പി.സി. എന്നിവരുടെ നേതൃത്വത്തില്‍ സിജേഷ്, ശ്രീറാം കെ, ശൈജേഷ്, ലതീഷ് കെ, മനോജ് എം, അനില്‍ കുമാര്‍, കെ.സി. സുജേഷ് കുമാര്‍, പ്രേംജിത്ത് സി.എം. ഹരിഹരന്‍, രതീഷ് ആര്‍ എന്നിവര്‍ ചേര്‍ന്നാണ് തീയണച്ചത്.