‘കുരുന്നുകളുടെ ജീവന്‍ സംരക്ഷിക്കുക’; അരിക്കുളം എല്‍.പി സ്‌കൂള്‍ കെട്ടിടം പുനര്‍നിര്‍മ്മിക്കണമെന്ന് ആവശ്യപ്പെട്ട് ഡി.വൈ.എഫ്.ഐയുടെ പ്രതിഷേധ സായാഹ്നം
അരിക്കുളം: അരിക്കുളം എല്‍.പി സ്‌കൂളിന്റെ ഉപയോഗയോഗ്യമല്ലാത്ത കെട്ടിടം പൊളിച്ചുമാറ്റി പുതിയ കെട്ടിടം നിര്‍മ്മിക്കണമെന്ന് ആവശ്യപ്പെട്ട് ഡി.വൈ.എഫ്.ഐ അരിക്കുളം മേഖലാ കമ്മിറ്റി പ്രതിഷേധ സായാഹ്നം സംഘടിപ്പിച്ചു. ‘പൊതുവിദ്യാലയം സംരക്ഷിക്കുക, കുരുന്നുകളുടെ ജീവന്‍ സംരക്ഷിക്കുക’ എന്ന മുദ്രാവാക്യം ഉയര്‍ത്തിയാണ് പ്രതിഷേധ സായാഹ്നം സംഘടിപ്പിച്ചത്.
നാടക-സിനിമാ നടനും സാംസ്‌കാരിക പ്രവര്‍ത്തകനുമായ മുഹമ്മദ് പേരാമ്പ്ര പരിപാടി ഉദ്ഘാടനം ചെയ്തു. ഡി.വൈ.എഫ്.ഐ ബ്ലോക്ക് സെക്രട്ടറി ബി.പി ബബീഷ് അഭിവാദ്യം ചെയ്ത് സംസാരിച്ചു. സനല്‍ അധ്യക്ഷനായ പരിപാടിയില്‍ അനൂപ് സ്വാഗതം ആശംസിച്ചു. പരിപാടിയില്‍ നൂറു കണക്കിനാളുകള്‍ സ്‌കൂള്‍ സംരക്ഷണ പ്രതിജ്ഞ എടുത്തു.