നമ്പ്രത്ത്കര: അമിത വേഗത്തിൽ ബുള്ളറ്റിൽ അഭ്യാസം, മൂന്ന് വിദ്യാർത്ഥികൾക്ക് പരുക്ക്. നടുവത്തൂർ ശ്രീ വാസുദേവ ആശ്രമത്തിലെ ഹൈ സ്കൂൾ വിദ്യാർത്ഥികളാണ് അപകടത്തിൽപെട്ടത്.

മൂന്ന് പേർ ഒരേ ബുള്ളറ്റിൽ ശബ്ദമുണ്ടാക്കി അമിത വേഗത്തിൽ ഇതുവഴി കറങ്ങുകയും ഒടുവിൽ ഒരു കടയിലേക്ക് ഇടിച്ചു കയറുകയുമായിരുന്നു.
അപകടത്തിൽ പരുക്കേറ്റ ഇവരെ ഉടനെ തന്നെ കൊയിലാണ്ടി ഗവണ്മെന്റ് ഹോസ്പിറ്റലിലേക്ക് കൊണ്ട് പോയി. വിദ്യാർത്ഥികളിൽ ഒരാൾക്ക് തലയ്ക്കും രണ്ടു പേർക്ക് കാലിനും പരുക്കുണ്ട്.

ബുള്ളറ്റ് ഇടിച്ചു കയറിയ കടയുടെ മുൻപിലുണ്ടായിരുന്ന കോൺക്രീറ്റ് തൂണും ഭീത്തിയും പൂർണ്ണമായും തകർന്നു. ‘സ്കൂൾ വിട്ടത് മുതൽ വിദ്യാർത്ഥികൾ ബൈക്കുമായി ചുറ്റുകയായിരുന്നു.
അമിതവേഗത്തിൽ റോങ് സൈഡിൽ വന്നിടിച്ചാണ് അപകടമുണ്ടായത്. ഈ ഭാഗത്ത് ബൈക്കുമായി കുട്ടികളുടെ അഭ്യാസ പ്രകടനങ്ങൾ സ്ഥിരമാണെന്നും, സ്കൂൾ അധികൃതർക്ക് നിരവധി തവണ പരാതി നൽകിയെങ്കിലും നടപടി എടുത്തിട്ടില്ലായെന്നു നാട്ടുകാർ പറഞ്ഞു.