കൊളസ്‌ട്രോളുണ്ടോ? എങ്കില്‍ അപകട സാഹചര്യം ഒഴിവാക്കാന്‍ ഈ കാര്യങ്ങള്‍ ശ്രദ്ധിക്കണേ


ട്ടുമിക്കയാളുകളെയും വലയ്ക്കുന്ന ജീവിതശൈലീ രോഗമാണ് അമിതമായ കൊളസ്‌ട്രോള്‍. ഗൗരവമായ, ചിലപ്പോള്‍ ജീവന്‍ തന്നെ നഷ്ടമായേക്കാവുന്ന പല ആരോഗ്യ പ്രശ്‌നങ്ങള്‍ക്കും കൊളസ്‌ട്രോള്‍ കാരണമാകാം. ഇതില്‍ ഏറ്റവും പ്രധാനപ്പെട്ടത് ഹൃദയത്തിന്റെ ആരോഗ്യത്തിന് കൊളസ്‌ട്രോള്‍ കാരണമുണ്ടാകുന്ന പ്രശ്‌നങ്ങളാണ്. ഹൃദയാഘാതത്തിന് വരെ അമിതമായ കൊളസ്‌ട്രോള്‍ വഴിവെക്കാറുണ്ട്. അതിനാല്‍ കൊളസ്‌ട്രോള്‍ നിയന്ത്രിച്ചുനിര്‍ത്തേണ്ടത് ആരോഗ്യത്തിന് അത്യന്താപേക്ഷിതമാണ്.

കൊളസ്‌ട്രോള്‍ ഉള്ളവര്‍ ശ്രദ്ധിക്കേണ്ട പ്രധാനപ്പെട്ട കാര്യങ്ങള്‍ പറയാം

ഇടയ്ക്കിടെ പരിശോധിക്കുക

ശരീരത്തിലെ കൊളസ്‌ട്രോളിന്റെ അളവ് ഇടയ്ക്കിടെ പരിശോധിക്കുന്നത് നല്ലതാണ്. കൊളസ്‌ട്രോള്‍ ഉള്ളവരാണെങ്കില്‍ പതിവായി ഇതിന്റെ നില പരിശോധിച്ച് ഉറപ്പിക്കുകയോ മനസിലാക്കുകയോ ചെയ്യേണ്ടതുണ്ട്. എന്നാല്‍ പലരും ഇക്കാര്യം നിസാരമാക്കി കളയാറുണ്ട്. എച്ച്ഡിഎല്‍, എല്‍ഡില്‍െ, ട്രൈഗ്ലിസറൈഡ്‌സ് എന്നിങ്ങനെയുള്ള മൂന്ന് ഘടകങ്ങളാണ് കൊളസ്‌ട്രോള്‍ നോക്കുമ്പോള്‍ വിലയിരുത്തുന്നത്. ഇതില്‍ എല്‍ഡിഎല്‍ (ചീത്ത കൊളസ്‌ട്രോള്‍ എന്നും പറയും) കൂടുന്നതാണ് കൂടുതല്‍ ശ്രദ്ധിക്കേണ്ടത്.

വ്യായാമം

കൊളസ്‌ട്രോളുള്ളവര്‍ ഇത് നിയന്ത്രിക്കുന്നതിന്റെ ഭാഗമായിത്തന്നെ വ്യായാമം പതിവാക്കേണ്ടതുണ്ട്. എന്നാല്‍ ഡോക്ടര്‍മാര്‍ നിര്‍ദേശിച്ചാല്‍ പോലും അധികപേരും ഇതിന് മെനക്കെടാറില്ല എന്നാണ് സത്യം. മരുന്നുണ്ടെങ്കില്‍ അത് കഴിച്ച് കൊളസ്‌ട്രോള്‍ നിയന്ത്രിക്കാം എന്നുതന്നെയാണ് മിക്കവരും ചിന്തിക്കുക. നടത്തം പോലുള്ള കാര്യങ്ങള്‍ ചെയ്താലും മതി, ഇതുതന്നെ കൊളസ്‌ട്രോള്‍ നിയന്ത്രണത്തിന് ഏറെ സഹായകമായിരിക്കും.

ശരീരഭാരം

കൊളസ്‌ട്രോളുള്ളവര്‍ ഏറ്റവുമധികം ശ്രദ്ധിക്കേണ്ടൊരു സംഗതിയാണ് ശരീരഭാരം. വണ്ണം കൂടുന്നത് തീര്‍ച്ചയായും കാര്യമായി എടുക്കണം. കാരണം ഇത് അനുബന്ധപ്രശ്‌നങ്ങള്‍ക്കുള്ള സാധ്യത പിന്നെയും കൂട്ടാം. ഡയറ്റ് കണ്‍ട്രോളും വര്‍ക്കൗട്ടുമുണ്ടെങ്കില്‍ ഇക്കാര്യത്തില്‍ പേടിക്കാനില്ല.

അലസത

കൊളസ്‌ട്രോളുള്ളവര്‍ ദീര്‍ഘസമയം ഒരേ രീതിയില്‍ ഇരിക്കുന്നത് അത്ര നല്ലതല്ല. ചിലര്‍ക്ക് ജോലി ഇത്തരത്തിലുള്ളതായിരിക്കും. അങ്ങനെയുള്ളവരാണെങ്കിലും പതിവായി കായികമായി എന്തെങ്കിലും ചെയ്യാനായി ശ്രമിക്കേണ്ടതുണ്ട്. ജോലിസമയത്തും ഇടയ്ക്ക് എഴുന്നേറ്റ് നടക്കുന്നതോ പടികള്‍ കയറിയിറങ്ങുന്നതോ പോലുള്ള ലളിതമായ കാര്യങ്ങളും ചെയ്ത് ശീലിക്കാം. അലസമായി ഏറെ സമയം ചെലവിടുമ്പോള്‍ എല്‍ഡിഎല്‍ നിലയാണ് കൂടുക. ഇത് വീണ്ടും കൊളസ്‌ട്രോള്‍ അധികരിക്കുന്നതിലേക്ക് നയിക്കും.

പുകവലി

ആരോഗ്യപ്രശ്‌നങ്ങളോ അസുഖങ്ങളോ സ്ഥിരീകരിക്കുമ്പോള്‍ ഡോക്ടര്‍മാര്‍ സ്വാഭാവികമായും പുകലി നിര്‍ത്താന്‍ നിര്‍ദേശിക്കാറുണ്ട്. എന്നാല്‍ ആളുകള്‍ ഇതിനെ കാര്യമായി എടുക്കാറില്ല. കൊളസ്‌ട്രോള്‍ രോഗികളുടെ കാര്യത്തിലും അവസ്ഥ മറിച്ചല്ല. എന്നാല്‍ കൊളസ്‌ട്രോളുള്ളവര്‍ പുകവലി പതിവാക്കുമ്പോള്‍ അത് എച്ച്ഡിഎല്‍ അഥവാ നല്ല കൊളസ്‌ട്രോള്‍ കുറയാനാണ് ഇടയാവുക.